Elvis Chan：《山寨最．強國》

講到山寨最強，我諗大家都一定諗到中國內地。由90年代的翻版電影、唱片、抄考原創品牌的山寨電器；到「無印良品」變出「无印良品」、「New Balance」 變出 「New Barlun」；到真正品牌被法院認為侵權證明不足反被罰款；到近排的「Samsung x 山寨Supreme」大開記招，還要在北京三里屯準備開設幾層高的旗艦店；草間彌生、Andy Warhol等非官方認可的「被展出」事件；2月份在中美貿易戰的限期下推出「藍叫可樂」抵制「可口可樂」等，都充分體驗到我國的神級山寨複製能力。怪不得「范爺」范冰冰和Angelababy 「撞樣」的人造人亦通街都係。

不過山寨產品又不是沒有捧場客，而且山寨品牌更有其產品發展部，改進原有產品的模型；或以原來的系列產品，再研發出更多不同系列的用品。像現在智能家居的潮流下，「小米」在家電和智能家居用品的發展上更是稱霸內地。到淘寶網站一搜，小米有電視、吸濕機、吸塵機、電動牙刷、音響甚至衫褲。由以往我哋認識小米手機到現在一系列的「米家」用品。不得不佩服「小米」能成為國內第一品牌的能力。以前我哋大多認為國內的品牌都係一味只識抄外國，以往每次新iPhone未出，你已經可以在「深圳華強」一帶搵到跟新iPhone一模一樣的「致敬版」。但經過多年來的「抄考」，加上國內科技及經濟發展日益增長下，反而國內一些品牌更着重於改進現有設計，甚至於比起外國的大牌子做得更徹底和人性化。這些都是國內越來越進步的例子。

成功建立自己品牌形象及規模的大有人在，而成功山寨到開得成行成市的亦一樣有。最成功「由山寨變鳳凰」的可以說是「周六福」珠寶金行了。眾所周知，香港的珠寶大行有「周大福」、「六福」和「周生生」等。而幾年前，就有一間名叫「周六福」珠寶金行進駐旺角開設旗艦店。大家都搲晒頭，周六福？即係大陸山寨牌子啦？點解可以係香港開㗎？上網搵吓資料，原來「周六福」喺2004年已經喺大陸開店，以特許經營的方式去賣珠寶同金器。而名字的由來則是創辦人說要向「周大福」同「六福」兩間老字號金行學習，所以才改「周六福」這名字（當然，信不信由你啦）。但佢竟然可以喺香港開埋旗艦店，而且喺佢官方網站仲搵到「2017中國500最具價值品牌」的美譽，所以呢，「周姓珠寶弟兄」們唔知會點睇呢？

同時，網上亦找到內地有「山寨一條街」，例如我哋熟悉的「Starbucks星巴克」變成「Starfucks墨巴克」、「Hermès」變「Herwes」、「H&M」變「H&N」等等。有時候真的不能不佩服國內同胞的「抄考」能力。笑到呢一度，不禁問一句：「點解我哋一定要抄人哋？」「點解唔可以有自己風格呢？」其實，一個品牌除了產品或服務的本質可以擊中消費者的慾望和心理，有品牌的風格都是十分重要。就像我開餐廳一樣，人家有的菜式，我哋唔一定要有；相反，我哋就要有自己風格，做一啲屬於我哋自己的菜式！推廣素食亦然，到而家同人講食素，仲係覺得好dry就係因為素食的形象比人覺得老土。所以，我的任務就是要將素食文化變得唔老土，仲要好食好睇，為新一代素食文化建立形象。如果國內有班人願意透過創意（像上面提及的山寨品牌，有啲名咁都諗得出）的能力去研發同建立品牌或某項技術出來，再加以改進同發展，我相信一樣可以贏到其他地方；就好似「華為」要搞5G一樣，唔知最後會係點呢？