梁栢堅：女強人？男弱人？

女強人，此三字應該從未宣之於口，吾非「女權L」，但亦有類似看法，強人則強人，不分男女，「女強人」此詞，已經有「女人正常是不強」之含意，你又有冇聽過「男強人」? 從沒，皆因男性本身應該是強？文字人，有時真係好鬼固執，一個詞彙可以諗到鬼死咁遠。

硬要講此題目，其實我睇法非常簡單：個個都差不多，那怕做到國家元首、億萬富婆、天后DIVA、花木蘭秋瑾、宋家皇朝，都係人一個，功名戰績乃外相，卸下征袍戰甲，咪又係正常女人，都需要有感情寄託、都需要有朋友分享時間吃喝玩樂、喺屋企睇韓劇都係會喊到傻、都係會拎部手機玩吓低能遊戲、會同寵物玩吓咁。人，其實閂埋房門大家都差不多，只不過你以為個女人本身咁勁，應該唔簡單嘅。

之前做過投資銀行工作多年，叻仔叻女見到悶，廿幾歲人仔已經頂尖大學畢業，幾年內爆上VP甚至MD位，10年內搵晒一世人要搵嘅錢，中環特有產物，今日睇番佢哋FB，都係結婚生仔，一係跑吓馬拉松做瑜伽，然後一年去幾次日本旅行咁，個個一樣，係囉，就係咁㗎咋，然後就開始變師奶，去到呢個地步，我先覺係最強一關，因為最難搞嘅嘢，唔係工作，反而係家庭。工作上，可以隨時轉工轉行繼續發揮，但家庭一開始咗就冇得Quit，心理同生理上嘅轉變，壓力有時仲大過工作。

廣東歌詞都有好多作品講及都市女性心態，最近謝安琪首《人妻的偽術》，其實幾「女強人妻」，可以做到「寧願和氣那面盡量被看得見，成為賢內助令大家都滿意」，最重要一點係「壓抑了個性來奉獻」，女人天生有種潤滑關係嘅能力，但同時發揮出「能拿捏進退是藝術就似比劍」，睇到呢份歌詞，男人都會感動，其實所有女人都有一種暗藏嘅「強」，係由得男方去攞吓威（當小朋友咁），而女性喺背後都有暗暗發力，唔敏感嘅男人又點會知道，女人有時可以偉大到「願你相信是你一手撐起我的天」，即係呃埋你都仲得，仲未夠，「若有需要做好彼此角色理應親善，理所當然如毅行慈善」，女人係可以做到咁，冇得唔服，真人真事，著名主持人阿Bob，百足咁多爪夠強未？但佢都話真正強者其實係Bob嫂，同佢生四個小朋友，仲幫佢處理晒後方各樣事務，未完，Bob嫂至叻係笑笑口成日讚老公，阿Bob當然唔傻，知阿嫂成日扮傻等佢覺得威，醒到爆。

所以你問到會唔會考慮Superwoman，其實Superwoman一街都係，係爭在你發唔發現佢真身啫，尤其喺香港，男女平等算係亞洲數一數二，各個專業界別男女都幾平均。都係嗰句，叻仔叻女見得多，去到最後都係常人一個。好多時唔係你自己去選擇一段關係，而係段關係選擇咗你。