梁栢堅：山寨王

翻看電影《龍過雞年》，飾演湯茱廸的梅艷芳，向警方報案表示丈夫黃百萬失蹤，於是找來九成九相似的周星星冒充，梅艷芳當然半信半疑，但最後仍相信（即使有大量穿崩位）。假冒，當成真，是古今故事必有元素，喜劇更加常見，而最奇情的，竟然是現實。我們身處的世界，山寨的事物，竟然可以打低原創。即係《賭聖》一樣，綺夢（張敏飾）失蹤，搵撈女萍（吳君如飾）頂上，而結局係賭聖最後真係同撈女萍一齊咁神奇。

連奧巴馬着到紅晒嘅New Balance，竟然可以被大陸山寨品牌New Barlun告上法庭，指其侵權，假嘢反而勝訴，New Balance仲要嘔番一億出嚟，呢單雖然已經係舊聞，但足以證明鬼佬係應該睇吓《九品芝麻官》一幕：原告變被告，被告變原告咁荒唐嘅事，常威，大陸一街都係，總之彈出又彈入咁，戚秦氏喺現實中當然唔會咁好彩，六月飛霜都幫你唔到。

Jordan又被大陸山寨喬丹告侵權，陳小春（洋名Jordan）其實可以又試吓，試吓告到Michael Jordan要改名，又或者遲吓香港再墮落啲嘅時候，佐敦區嘅居民，又可以告吓約旦領事館都得。你唔好笑，個世界失控到Samsung手機，係搵錯大陸山寨Supreme合作，大陸Supreme係照DUP正版，深圳有間專門店，大家得閒可以觀摩學習一下，但記住唔好着件真Supreme去，因為你會被「方力申式」恥笑：你個嘢假㗎。

一過咗深圳河，所有嘢就好似Stranger Thing一樣，進入咗個神奇結界，佢哋製造嘅嘢先係真，佢哋先係發明智能手機始祖，先秦時代阿項少龍已經同秦始皇Whatsapp緊，歷史書有寫，iPhone自古以來都係中國嘅。大陸早前有套電影《再見奧特曼》，就係講鹹蛋超人去中國生咗兩個仔（地球咁多地方唔揀剩係揀中國你已經知猛料），日本人見到呢套嘢當然扯火，要告大陸侵權，個導演先型，話自己唔係盜版唔係山寨，係有正式授權！佢真係爭「其實鹹蛋係中國食物，日本反而要交番之前啲授權費」未講，情況其實有啲似晚清，列強踩入大陸打完仗又屈又搶，今日情況相反咁解。

再講落去其實可以寫滿成本《ELLE MEN》，喂你有冇一刻開始懷疑自己手上呢本雜誌係真版定山寨? 而寫呢篇嘅我又係咪真正嘅梁栢堅？定係有個冒牌嘅人扮個儍佬寫嘢？再從而懷疑自己係咪真係嘅自己？如果係開始懷疑一切，我真係恭喜你，你已經同名哲學家笛卡兒同Level，因為其中一步係肯懷疑自己嘅存在，就正如Michael Jordan都會有一刻，諗吓自己其實係咪賣緊山寨波鞋一樣。經濟學講過，假銀紙喺市面出現流動性一定最大，因為有懷疑之下，一定放出去先，就算唔好彩被人拉，厚顏講句我一直認為佢真就得。個世界變得太快，今日你笑佢山寨，有日佢領導世界。