只屬於美斯的寂寞，登峰造極的男人

昨日與同事一邊討論利物浦和巴塞的歐聯比賽，一邊登上一輛的士。剛上車，司機就聽到我們的對話，馬上說：「你哋傾緊尋晚場波呀？」他鄉遇故知，我倆當然馬上回答：「係呀係呀，嘩尋晚美斯幾勁呀⋯」

「等等，你唔好介意我咁講，其實我最憎就係美斯。」當下我與同事面面相覷，覺得有點尷尬，司機繼續說：「我最鍾意就係C朗，又靚仔又型，頭鎚又勁，絕對係完美嘅偶像！美斯呢啲矮仔，拍馬都追唔上！」靚仔？我同意的，如果你選偶像，外貌又的確是最重要。我同事是巴塞球迷，當然忍不住反擊：「但美斯尋日嗰罰球30幾碼，直飛死角喎。」

「其實係嘅，罰球美斯真係好勁，講真，1對1佢真係過硬你，1對2通常都過埋你，幾個夾佢就會交到空位做助攻㗎喇。」年過50的司機有點慨嘆的說着，言語間帶着無奈，就算十萬個不情願，他心裡都認同美斯絕對是近代球王。「如果可以，我都好想係球場試下畀美斯扭過，到底係咩感受呢，哈哈⋯」司機說到興高采烈，雙手幾乎離開駄盤。

喜歡，是個人選擇；實力，卻是客觀事實，你與我都知道，世上已經沒有美斯不能單對單扭過的後衛，沒有傳不出的助攻，更沒有進不了的入球。有人說他未有在國際賽上有任何獎盃，沒有去其他聯賽證明自己，但美斯細微的身體動作，每每都能晃過對手，一季91球的紀錄更是無人能破。近季一手包辦突破、入球、組織、助攻、分波，連當年沙維與恩尼斯達的功能也完美消化。就算你不喜歡他，但都會如這位的士司機一般，默默地認同美斯的能力絕對是唯一。